Coma cada ano, a Asociación de Amas de Casa de Ribeira organiza a Homenaxe ás Persoas Maiores, en colaboración co Concello, a cal incluirá chocolate con churros e a actuación de Mar Davila. A cita terá lugar o 22 de marzo, a partir das 17.00 horas, no restaurante Baiuca. Neste senso, a saída de buses efectuarase ás 16.30 horas desde as marquesiñas situadas no entorno do mercado municipal. A retirada das invitacións pode realizarse no local da entidade, de luns a venres, en horario de 10.30 a 13.00 horas.
A presidenta das Amas de Casa, Puri Cores, manifestou que agardan acadar a asistencia do pasado ano, contando con ao redor de 300 persoas. Tamén expresou que “este é un dos actos máis bonitos que temos dentro da asociación porque as persoas maiores son a nosa vida, as persoas que nos ensinaron todo.”
Por outra banda, a tesoureira do colectivo, Merchi Argibay, comunicou que xa está aberta a inscrición para a excursión a Lourdes, a cal se desenvolverá do 21 ao 25 de abril. Visitarase Burgos, Lourdes, grutas de Betharram e Cantabria. O prezo establécese nos 345 euros e inclúe traslado en autobús, hotel, pensión completa, entrada ás grutas e guía acompañante. O mínimo de prazas son 30 e o máximo 50. As persoas interesadas poden anotarse na sede situada en Ribeira, na rúa Monumento 5 Entreplanta, ou a través do teléfono de contacto 981874577, do whatsapp 619066684 ou do enderezo electrónico amasdecasaderiveira@gmail.com.