O BNG ribeirense celebra que se asuma oficialmente o topónimo con ‘b’

03 Marzo 2020
Membros dos distintos grupos da corporación municipal xunto cos comparecentes no acto de hoxe. Cedida

Os nacionalistas de Ribeira cualifican o día de hoxe como “histórico”, despois de que que o Concello asuma oficialmente o topónimo con ‘b’, volvendo “á súa forma orixinal e lexítima.”

Os concelleiros Xosé Vázquez Cobas e Luís Pérez Barral amosaron a súa satisfacción porque “hoxe constátase que a presión do movemento social a favor de restituír a forma lexítima de Ribeira, xunto coas iniciativas realizadas polo BNG ao longo dos últimos anos e os requirimentos de diversas institucións e asociacións, dá froito e provoca un cambio histórico.”

Pérez Barral declarou que “isto é un logro da razón fronte os caprichos irracionais duns poucos”, ademais de poñer en valor tódalas iniciativas realizadas pola formación no Concello, no Parlamento de Galicia, no Valedor do Pobo e en Política Lingüística. Así, o edil concluíu afirmando que “é un día de alegría porque desde hoxe e para sempre, Ribeira será con be.” 

Desde o Bloque avanzaron que se manterán vixiantes co obxectivo de que, segundo apuntaron, se inicie dun xeito progresivo o cambio das formas deturpadas e se empregue a forma correcta. Os nacionalistas tamén acusaron ao alcalde Manuel Ruiz de que, durante estes anos, “gastase cartos públicos en instalar letreiros coa forma deturpada sen importarlle que estivese atacando a lingua galega e incumprindo a lexislación vixente.”

Outros artigos

Publicidade

Revista en papel

Opinión