A Coordinadora para o Estudo dos Mamíferos Mariños (CEMMA) compartiu os días pasados o localizamento dun arao dos cons (Uria aalge) cuberto de chapapote na costa de Aguiño en Ribeira, máis polo miúdo na praia do Almacén en Couso. O paxaro foi atopado polo veciño Antonio Parada Mariño, que logo de albiscalo púxose en contacto co Centro de Recuperación de Fauna Silvestre para a súa recollida e (logo dunha estadía de recuperación) posterior ceibado.
Tanto o CEMMA como Parada Mariño puxeron o foco na importancia de que teñamos en conta que non é preciso que aconteza outra catástrofe como a do Prestige para que a nosa fauna salvaxe sufra polas consecuencias do petróleo e dos seus derivados (os combustíbeis fósiles) e dos malos hábitos de quen transporta ou usa estes materiais (son moi habituais na costa galega os sentinazos dos buques, ou sexa, a liberación de chapapote derivada das tarefas de limpeza ou mantemento). Antonio Parada e a comunidade do CEMMA lembran tamén que o feito de que se localizase e socorrese o devandito arao da praia do Almacén foi un caso por desgraza puntual, e que nestes últimos tempos estanse a multiplicar os avistamentos de aves petroleadas (en Barbanza e na Costa da Morte) por mor, principalmente, dos sentinazos dos moitos buques que transitan polo corredor atlántico que bordea a costa galega. Moitos destes paxaros, algúns deles pertencentes a especies en risco, non terán nunca a sorte de seren socorridos.
