Ao redor das 16.40 horas de onte recibiuse aviso dun incendio no terceiro andar dun edificio situado na rúa Linares Rivas, en Santa Uxía. O lume estaba bastante desenvolvido e virulento, pois xa saía por unha das fiestras. Ata o lugar desprazáronse bombeiros de Ribeira, de Boiro, Policía Local e Policía Nacional.
Primeiramente, actuouse coa autoescada para evitar que as lapas continuasen saíndo ao exterior e, seguidamente, procedeuse ao interior do edificio para extinguir o incendio. A continuación, aseguráronse de que non quedase ningún foco de lume nin de calor, e aireouse o inmoble coa axuda dun ventilador para sacar o fume e tódolos gases. A intervención rematou ao redor das 17.50 horas e tan só houbo danos materiais, principalmente, na zona do dormitorio, con mobles e roupa.
Ao parecer, a vivenda é ocupada con frecuencia por toxicómanos.
