O local da Asociación de Empresarios de Ribeira acolleu o venres 28 unha reunión á que asistiron o presidente da patronal, Francisco Martínez; o alcalde Manuel Ruiz; o edil de Relacións Institucionais, Turismo, Promoción e Dinamización Económica, Ramón Doval; o conselleiro de Economía, Emprego e Industria, Francisco Conde; e unha trintena de empresarios interesados no novo polígono.
O rexedor expuxo os antecedentes e en que punto se atopa actualmente a creación do novo parque empresarial. Tamén explicou que a modificación que tiveron que facer do Plan Xeral Urbanístico foi unha das razóns que motivou o retraso, pero sinalou que xa se pode estimar que a partir de mediados deste ano se aprobe a modificación do Plan e que se sacará unha listaxe previa de interesados. Neste senso, prevese que a finais deste 2020 se proceda coa aprobación definitiva do Plan, empezando xa coa expropiación e urbanización, calculándose que o custe sexa de 50 euros por metro cadrado.
Pola súa parte, o conselleiro Francisco Conde detallou a liña de axudas para os polígonos e anunciou que proximamente se sacarán novas achegas para contribuír á súa creación. Isto unido a que, tal e como apuntou, Ribeira é “un concello emprendedor”, redunda en que as empresas teñan moitas facilidades á hora de acceder ao solo empresarial. Así mesmo, expresou o compromiso da Xunta de Galicia para facilitar un marco de colaboración co Concello ribeirense que terá continuidade coa posta en marcha deste novo polígono e apoio aos investimentos.
Desde a Asociación de Empresarios de Ribeira, o presidente Francisco Martínez asumiu o compromiso de facer un seguimento, en colaboración co Concello, dos prazos establecidos, ademais de organizar outro encontro en relación a esta cuestión, a petición de tódolos interesados.
