O Misterio Fiscal demanda catro anos e medio de prisión para dous homes, maiores de idade e sen antecedentes penais, como presuntos autores dun delito contra a saúde pública na súa modalidade de substancias que causan grave dano.
Segundo o escrito da Fiscalía, os feitos remóntanse a marzo do 2017 durante o transcurso dun dispositivo de vixilancia levado a cabo pola Garda Civil de Boiro, na zona dos xardíns de Valle-Inclán da Pobra do Caramiñal, ante as sospeitas de que os acusados, “postos en común e previo acordo na acción”, se dedicaban á venda de substancias estupefacientes, comprobándose como acudían ao citado lugar numerosos mozos consumidores de drogas. O texto tamén recolle que, previamente, os acusados escondían ovos Kinder, con cocaína no seu interior, entre os arbustos da zona, sendo interceptados polos axentes actuantes. No momento do arresto interviñéronlle a un dos acusados 10 bolsiñas plásticas de cocaína, cun peso de 2’674 gramos e un valor no mercado de 159’10 euros; mentres que o outro portaba 5 bolsiñas plásticas de cocaína, cun peso de 1’337 gramos e un valor no mercado de 79’55 euros, así como unha bola de haxix, de 0’186 gramos e cun valor de 10’15 euros, e un total de 91 euros fraccionados en moedas procedentes da venda de substancias a terceiros.
Ademais dos catro anos e medio de cárcere mencionados anteriormente, a Fiscalía pide inhabilitación especial para o dereito de sufraxio pasivo durante a condena e 650 euros de multa.
O xuízo está previsto para o próximo mércores, na sección sexta da Audiencia Provincial, con sede en Santiago de Compostela.
