A praza do Emigrante da Pobra do Caramiñal, a carón da Alameda, vai acoller este domingo ás 13.30 horas un importante acontecemento deportivo para a nosa comarca: a presentación dos equipos de bateis que van competir baixo o nome do Club Remo local nesta tempada 2020. Segundo puidemos saber, máis de 70 rapaces e rapazas, e tamén algún deportista absoluto e absoluta, estarán presentes no acto, como tamén os barcos e remos que empregarán para as vindeiras competicións.
Igualmente, farán acto de presenza os responsábeis das empresas e das entidades patrocinadoras que, segundo lembra o Club, “fan realidade esta actividade deportiva”.
Á presentación está convidada toda a veciñanza que queira completar a sesión vermú do domingo cunha paréntese de gran interese deportiva: unha moi boa oportunidade para coñecer, de primeira man, aos equipos que representarán á Pobra nesta tempada.
Tempada de bateis 2020
A presentación coincide co remate de seis meses de adestramento continuo, un tempo que lles serviu ás categorías base do Club para afrontar as importantes regatas do calendario vindeiro. Segundo informan dende a entidade deportiva pobrense, malia que “o listón está moi alto”, hai ilusión por seguir repetindo os éxitos da tempada anterior: “O ano pasado os infantís masculino proclamáronse campións de España, fito que será moi complicado repetir, pero as ganas son as mesmas”.
