Por mor da actual situación de crise sanitaria e estado de alarma, o Concello de Boiro anunciou a cancelación do mercadiño semanal que se ía celebrar o vindeiro martes, só cos postos de alimentación. O Goberno local decidiu suspender a instalación dos postos de venta ambulante tras o decretado no Diario Oficial de Galicia do día 24 de marzo.
O Concello lembra que se ben tiña previsto permitir a celebración da actividade limitando a presenza aos vendedores do sector da alimentación (tomando as medidas de seguridade necesarias e co obxectivo de aliviar a presenza de veciñas e veciños nos supermercados e asegurarlles a posibilidade de adquirir produtos e alimentos frescos de primeira necesidade), finalmente adiouse por mor da decisión tomada esta semana polo Goberno galego de prohibir o desenvolvemento de mercados tradicionais nos concellos até o 31 de marzo.
Do mesmo xeito, tamén se reduciu o horario de apertura do Mercado Municipal de Boiro. Neste senso, o Goberno local sinalou que a praza de abastos está pechada de luns a xoves pola tarde e co aforo controlado, de xeito que só se pode acceder pola porta principal e unicamente un máximo de 50 persoas. “Estas medidas”, explica o Concello, “prolongaranse durante e tempo que dure o estado de alarma e condicionadas a calquera variación que determinen as autoridades sanitarias autonómicas ou estatais”.
