A Deputación da Coruña vén de convocar as axudas do Plan de Emprego Local (PEL-2020) dirixidas a pequenas e medianas empresas, autónomos/as, emprendedores/as e concellos da provincia. En termos máis concretos, búscase con estes apoios fomentar o afianzamento e fortalecemento do tecido produtivo, axudando a crear emprego e financiando investimentos que contribúan a modernizar as empresas e facelas máis competitivas. Ou sexa, investimentos que axuden na súa transformación tecnolóxica e dixital. O prazo de solicitudes está aberto ata o vindeiro 24 de marzo.
O presidente da Deputación, Valentín González Formoso, e o deputado responsábel da área de Emprego, José Ramón Riobóo, presentaron este xoves 5 a convocatoria do PEL 2020, salientando que este que vén de comezar é o cuarto ano que se convocan as ditas axudas, que parten dun orzamento inicial próximo aos 7 millóns de euros, dos que 2,5 millóns se destinan a subvencionar a contratación de traballadores/as, 1,3 millóns a financiar novos investimentos en empresas de recente creación e 3 millóns a financiar as contratacións nos concellos.
Tamén explicaron que dende a súa creación en 2016, o Plan de Emprego Local supuxo un investimento de 26,7 millóns de euros, que permitiron a creación de 2.636 empregos directos e subvencionaron investimentos para modernización e mellora de 1.948 empresas coruñesas.
PEL-PEME
A liña PEL-PEME subvencionará ás pequenas empresas e autónomos con sede nos concellos de menos de 20.000 habitantes da provincia da Coruña para a contratación laboral dunha persoa en situación de desemprego durante un período de 12 meses. A Deputación financiará o 70% do soldo e a Seguridade Social do/a traballador/a contratado/a, ata un máximo de 15.400 euros anuais.
Habilítase tamén unha liña PEL-PEME Mantemento, coa que a Deputación subvenciona o mantemento das contratacións laborais indefinidas da convocatoria anterior do programa durante un ano máis. Deste xeito, as empresas poden optar a unha nova axuda para manter o posto de traballo creado en 2019 durante 12 meses máis. Nestes casos, a Deputación financiará o 50% do soldo e Seguridade Social do traballador/a cun importe máximo de 11.000 euros anuais.
PEL-Emprende, axudas para investimentos
A liña PEL-Emprende está destinada a autónomos e empresas da Coruña con menos de cinco anos de antigüidade e sede social en calquera dos concellos da provincia. As axudas cubrirán ata o 70% do investimento, cun máximo de 17.500 euros, para a compra de aplicacións informáticas, maquinaria, útiles, mobiliario e equipos para procesos de información. Todos eles deben ser elementos novos e directamente relacionados coa actividade da empresa.
PEL- Concellos crea emprego e mellora os servizos públicos
A Deputación da Coruña consigna tamén este ano unha partida de 3 millóns de euros para apoiar aos concellos da provincia na contratación de persoas desempregadas para a prestación de servizos locais básicos. O organismo provincial publicou onte no BOP a convocatoria do PEL-Concellos 2020 á que poderán acollerse os 82 concellos da provincia con menos de 20.000 habitantes. En función da porcentaxe de persoas desempregadas coas que conte o municipio, as subvencións para as contratacións oscilarán entre os 19.000 e os 52.000 euros.
O prazo remata o 24 de marzo
A solicitude das axudas só poderá realizarse co envío da documentación requirida nas bases de xeito telemático, a través da plataforma SUBTEL da Deputación. Todos os anexos requiridos para a presentación das solicitudes poderán ser descargados na plataforma, na sección correspondente ás diferentes convocatorias. O prazo de presentación remata o vindeiro 24 de marzo ás 14.00 horas.
