A Business Factory Food (BFFood), a aceleradora do sector alimentario de Galicia impulsada pola Xunta e o Clúster Alimentario de Galicia, amplía o período de inscrición de candidaturas á súa primeira convocatoria de consolidación. A data definitiva de peche de recepción de propostas decidirase unha vez finalice o Estado de alarma decretado polo Goberno central con motivo da alerta sanitaria xerada polo coronavirus.
O programa de consolidación da BFFood está enfocado a empresas xa constituídas, con menos de seis anos de antigüidade, cun produto ou servizo definido e primeiras vendas xa realizadas, e aliñadas con algún dos retos que busca resolver o sector alimentario. A presentación de solicitudes debe facerse a través do formulario de inscrición dispoñible na páxina web da aceleradora: bffood.gal/inscripcion.
Ata seis proxectos poderán ser seleccionados nesta convocatoria de consolidación na que recibirán formación, coaching, servizos técnicos, infraestruturas e medios especificamente concibidos para o seu ámbito de desenvolvemento, así como financiamento mediante un préstamo participativo por parte da Xunta -a través de XesGalicia-, que podería supoñer unha opción de capitalización de ata un máximo de 250.000 euros.
A BFFood forma parte da plataforma StartIN Galicia e esta nova convocatoria conta co apoio de grandes empresas do sector que se encargarán do proceso de mentoría dos proxectos que resulten seleccionados: Bodegas Martín Códax, Cafés Candelas, Calvo, Capsa Food (Larsa), Clavo Food Factory, Cooperativas Lácteas Unidas (Clun), Congalsa, Dairylac, Gadis, Kiwi Atlántico, Quescrem, Nueva Pescanova, Torre de Núñez e Viña Costeira.
Entre as entidades colaboradoras atópanse, ademais, as tres universidades galegas, a Asociación Galega de Cooperativas Agrarias (Agaca), Anfaco-Cecopesca, o Instituto Tecnolóxico de Galicia (ITG) e a Fundación Empresa-Universidade Galega (Feuga), que forman parte do comité técnico. Pola súa parte, Gradiant, Coremain, a Cámara de Comercio de Santiago de Compostela, ASM, Cesga, a Asociación Área Empresarial do Tambre e Sigillum Knowledge Solutions integran o comité asesor da aceleradora.
