Co obxectivo de mitigar os efectos do confinamento forzoso das familias e poñendo o foco no lecer para os máis pequenos nestes tempos de coronavirus e restricións, a editorial Kalandraka e as bibliotecas municipais da nosa terra están a desenvolver na Rede, a través da páxina web Kalandraka.tv, unha iniciativa que permite que as nenas e nenos sigan a desfrutar estes días das sesións de contacontos.
Na iniciativa A Hora do Conto xa participa a Biblioteca Municipal de Rianxo. A elección deste venres 20 (O pequeno indio de Bea, Miguel e Andrés) veu da man da Biblioteca de Rois e podemos vela tamén en Kalandraka.tv.
Esta semana tamén elixiron conto para publicar as Bibliotecas de O Saviñao, Salvaterra de Miño e Miño.
Dende a Biblioteca de Rianxo recomendan encarecidamente os contidos de Kalandraka para o desfrute e a formación da rapazada nestes días de encerro nos fogares, xa que é un dos nosos principais referentes editoriais en materia de literatura infantil e xuvenil e, tamén, polo seu gran esforzo por encher as redes de contidos en galego e de calidade.
