A Asociación de Mulleres da Barbanza vén de facer un chamamento a pechar fileiras arredor da celebración do 8 de marzo, o Día Internacional da Muller Traballadora, cuxa nova edición porá o foco nas mulleres que se adican as coidados e apenas reciben recoñecemento, dignificación nin compensación de ningún tipo por parte do sistema económico e social vixente. O lema desta convocatoria será o seguinte: Sen coidado non hai vida, mudando o sistema, derrubando o patriarcado. Mulleres da Barbanza adhírese de maneira integral a esta reivindicación para “poder compatibilizar os coidados co traballo remunerado, unha necesidade que reclamamos dende o século pasado e que aínda a día de hoxe non é unha realidade”.
A cita convocada polo noso colectivo local será na xornada do domingo na praza de España de Ribeira, onde se levará a cabo un acto reivindicativo (de 11 a 13 horas) e máis a lectura dun manifesto. Previamente á lectura levaranse a cabo, colectivamente, murais feministas na contorna da devandita praza. Están chamadas e chamados e participar non só as mulleres de Ribeira e da comarca, senón tamén familias enteiras co fin de acadar a máxima repercusión (“toda a veciñanza en xeral para aportar o noso grao de area no pintado dos murais feministas”). A asociación tamén manifestou que será be recibido material diverso de pintura por se se dese o caso de que non houbese de abondo.
