A formación Suma Ribeira levará a pleno un rogo relativo ao establecemento de paradas sinalizadas do autobús urbano nas inmediacións do ribeirense Centro de Saúde, tanto no percorrido Aguiño-Castiñeiras-Ribeira coma no sentido contrario. Así mesmo, solicitan que se estableza unha parada sinalizada entre o apeadeiro e a parada do PAC en sentido Aguiño.
Esta petición fundaméntase, segundo explican, no desexo da veciñanza de que o servizo de transporte urbano dispoña dunha parada próxima ás referidas instalacións sanitarias. Tamén indican que as xestións realizadas “informalmente” co equipo de goberno municipal “non se amosaron ata agora eficaces.”
Suma Ribeira engade que consideran “razoable e esixible que as usuarias que acoden para recibir atención médica poidan desprazarse desde os seus domicilios mediante o transporte público urbano”; ademais de que “son obvias as razóns que aconsellan que moitas destas persoas usuarias do PAC de Ribeira teñan que desprazarse a distancia mínima imprescindible para coller o autobús.”
