Este martes 4 de febreiro é o Día Mundial Contra o Cancro e as nosas entidades e colectivos van pechar fileiras arredor da dita xornada, poñendo en marcha actividades de sensibilización e información. Por exemplo a xunta local de Ribeira da Asociación Española Contra o Cancro, que anunciou a realización, mañá, dunha campaña divulgativa na rúa Rosalía de Castro, en horario de 11.00 a 13.00 horas e de 17.00 a 19.00. Tamén os outros concellos e Arousa Norte contarán con mesas informativas para dar a coñecer o que facer da asociación e os seus servizos de apoio psicolóxico, atención social e orientación sanitaria. Amais, repartiranse folletos conmemorativos desta campaña.
Segundo informa a xunta local de Ribeira, a campaña diríxese a toda a cidadanía co obxectivo de facer ver ás veciñas e veciños as importantes contribucións que poden facer a prol da loita contra a dita doenza, non só á hora de poñer en práctica métodos de prevención e extensión do coñecemento, senón tamén para participar mobilizando contribucións económicas dirixidas á investigación ou no apoio de persoas enfermas e familiares.
Amais, a Xunta Local lembra que o día 4 de febreiro ás 21.00 h a fachada da Casa do Concello de Ribeira iluminarase en verde, para dar apoio á campaña de prevención da asociación.
