Os socialistas de Ribeira, a través da concelleira Rita Rial, veñen de presentar para ser tratada en pleno unha queixa sobre o funcionamento do punto de reciclaxe e recollida de refugallos eléctricos e informáticos da praza do Concello, o Minipunto Limpo. Segundo indica o PSdG local, se ben o acubillo de material en desuso (CDs, baterías, cartuchos de tinta, bombillas, etc) está a cumprir coa súa misión, a “que non cumpre coa mesma é a empresa encargada de manter o depósito en bo estado”, xa que os receptáculos para os cartuchos de impresora, para os aparellos electrónicos e para as lámpadas de baixo consumo están “cheas a rebordar”, explica a agrupación.
A raíz de todo isto, o PSdG pide que se “efectúe con máis presteza e dilixencia a recollida de material da praza do Concello, co fin de dar unha imaxe dun labor de mantemento axeitado para os usuarios e os veciños en xeral”.
