O grupo municipal do Partido Barbanza Independiente (PBBI) levará ao pleno un rogo para que se estude a regulación do tráfico na zona das dúas rotondas do ribeirense polígono industrial de Xarás con pasos de peóns “en aras de conseguir unha maior seguridade para os transeúntes.”
A formación expón que recibiu peticións para a incorporación de melloras en materia de seguridade viaria, concretamente para os peóns que transitan polo referido lugar. Neste senso, sosteñen que se demanda a prolongación da beirarrúa da glorieta do barco dirección a marquesiña -incluso máis alá- que se sitúa onde a finca de La Soledad ao inicio da estrada que conduce ao cruce de O Vilar e Aguiño, para, a continuación, sinalizar un paso de peóns “e evitar o perigo que actualmente supón cruzar por esa zona que rexistra un elevado volume de tráfico, sobre todo, para os nenos e mozos que collen alí o autobús para ir e regresar de centros educativos, especialmente ás 08.30 e ás 14.30 horas”, engaden.
O PBBI tamén manifesta que lle suxeriron que se pinte un paso de peóns na vía que conduce á gasolineira para que se poida pasar desde a área das vivendas sociais á outra marxe e viceversa. Así mesmo, afirman que se lle deu traslado de que se sinalice outro paso de peóns na estrada AC-550, á altura dos depósitos de auga e a marquesiña, así como outro na avenida Ramiro Carregal Rey, coa finalidade de que os viandantes poidan cruzar desde o lado onde se sitúan os citados depósitos ata o Eroski Center e viceversa.