Esta fin de semana (venres 14 e sábado 15) vaise celebrar en Ribeira un novo encontro da Aula Galega de Saxofón e, do mesmo xeito que na anterior edición da xuntanza, incluirá unha actuación musical. Se no mes de xaneiro Rodrigo Vila, o profesor do espazo formativo, ofreceu un concerto a dúo con Martín Castro (ex alumno do Conservatorio de Ribeira e da Aula Galega de Saxofón), desta volta será un concerto en forma solista.
Rodrigo Vila ofrecerá un concerto este venres 14 ás 20:30 horas no salón de actos do Conservatorio ribeirense e o programa incluirá obras de Johann Sebastian Bach, Luciano Berio, François Rossé e Javier Girotto.
O Concello de Ribeira lembra que o mestre Vila é o profesor tamén dun seminario nunha cidade china próxima a Wuhan ao que acode cada dous meses, pero nesta ocasión debido aos problemas de comunicación e mobilidade derivados do andazo do coroavirus, o seminario foi aprazado e, de acordo co alumnado da Aula Galega (que se celebra unha vez ao mes no Conservatorio con presenza de estudantes de saxofón de toda a xeografía galega), Rodrigo adiantou a súa visita a Ribeira unha semana xa que estaba prevista para o fin de semana do 21 e 22.
