Este venres 14 de febreiro celébrase no Centro Social de Boiro a presentación do libro A xestión cultural en Galicia, unha publicación-investigación que bota luz sobre o sector cultural da nosa terra, na nosa lingua, e as súas perspectivas profesionais (as perspectivas dos eidos da edición, o audiovisual, as artes plásticas ou a música, entre outros). O acto está previsto para as 20.00 horas, no Centro Social de Boiro.
Segundo fai saber o Concello, a publicación tivo unha primeira difusión dixital, da man do xornal Praza Pública e agora vén de dar o chimpo ao formato libro, tradicional, grazas ao selo Andavira. Na obra analízase de xeito pormenorizado a situación actual dos ámbitos da edición, do audiovisual, das artes plásticas, da música e, tamén, das diferentes canles de financiamento para sacar adiante proxectos individuais ou colectivos de ámbito cultural. Tamén se abordan nas súas páxinas os principais atrancos, desafíos e oportunidades do sistema cultural galego.
