O Concello de Ribeira pavimenta sete camiños nos Areeiros

O Concello de Ribeira informa esta semana do desenvolvemento duns traballos para acondicionar os viarios de Os Areeiros, na parroquia de Castiñeiras. Os labores consisten na pavimentación de sete camiños emprazados no devandito núcleo, máis concretamente na contorna da estrada DP 7307 que une Santa Uxía e Aguiño ao seu paso pola parroquia de Castiñeiras, nas proximidades da praia do Castro-Catía.

Segundo informa o Concello, os camiños estaban dotados de firme aglomerado, pero este atopábase deteriorado polo uso e polas inclemencias do tempo, polo que se fixo necesario aplicar nos sete camiños (de 132, 12, 24, 37, 29, 54 e 70 metros de lonxitude) unha mestura bituminosa en quente de 6 centímetros de espesor. Como paso previo á conclusión da obra, o Executivo ribeirense lembra que só resta o marcado da sinalización viaria e o recrecido das tapas de rexistro. A obra foi executada pola empresa Nemesio Ordóñez, S.A., e supuxo un investimento de 22.958 euros.