Este luns presentouse na sala de xuntas do Concello de Pobra a axenda de febreiro das Asembleas Veciñais que se van desenvolver ao longo deste mes en diferentes recantos do termo municipal, co obxectivo de mobilizar á veciñanza e mellorar, coa súa participación activa, a estratexia de acción local. Serán, de entrada, nove xuntanzas para establecer o máximo diálogo coa cidadanía.
Interviñeron José Andrés Lojo, concelleiro de Participación Veciñal (presentando o calendario de asembleas) e Estefanía Ramos, concelleira de Servizos Municipais (mostrando a total dispoñibilidade do seu departamento para atender todas as demandas das veciñas e dos veciños en materia de mantemento de viarios, recollida do lixo, alumeado, etc). Pola súa banda, Patricia Lojo, edil de Cultura, deu a coñecer os detalles do calendario de actividades relacionado coa súa concellería e, tamén, coas restantes (deportes, igualdade, turismo, dinamización económica, etc).
A programa de asembleas comezará mañá mesmo, martes 4, en Camiño Ancho, no Centro Sociocultural, a partir das 20.30 horas (igual que as restantes xuntanzas). A seguinte cita será no Maño, este xoves 6, no Centro Sociocultural, seguida da cita no local da comunidade de montes en San Isidro o día 11 de febreiro. Ao día seguinte, o 12, tocaralle a Santa Cruz, na Escola da Granxa, e unha xornada despois, o 13 de febreiro, celebrarase a asemblea da Ribeiriña-O Conchido no Centro Sociocultural.
A actividade proseguirá a terceira semana de febreiro, coa cita do Campiño (o día 17 na antiga escola de música), a de Ponte Barbanza (o día 18, no local do Muíño), a da Angustia (o día 19 na Escola do Campo) e na propia vila da Pobra (o día 20, no auditorio do Museo Valle-Inclán).
Na convocatoria cos medios de hoxe tamén participou o alcalde Xosé Lois Piñeiro, quen fixo un repaso polas vindeiras actuacións do Concello en materia cidadá: os orzamentos 2020 (que se tentarán presentar e aprobar contando coa máxima participación da xente da Pobra, reflectindo polo miúdo as súas propostas) e a inclusión de dous novos centros socioculturais no programa de reunións e actividades (o do Maño, na antiga Escola de Vilariño, e o da Angustia, na antiga Escola do Campo).
Asemade, o rexedor anunciou a vindeira presentación de tres proxectos: o novo Centro Sociocultural de Santa Cruz, o acondicionamento do Centro Sociocultural do Camiño Ancho (con dotación de parque infantil) e a reforma do Camiño Real na Ribeiriña-O Conchido.
