O Concello da Pobra, a través da súa área de Medio Ambiente, vai organizar esta semana unha serie de charlas informativas sobre o aceite de cociña que empregamos decote no noso fogar ou no noso local hostaleiro e as posibilidades que ofrece, cada vez maiores, en materia de aproveitamento. Por suposto, tamén se porá o foco en como favorecer a súa reciclaxe. As charlas desenvolveranse este martes 11 e mércores 12 de febreiro en diferentes recantos do concello.
O obxectivo, en palabras do Concello, “é dar a coñecer a importancia de usarmos tódolos colectores laranxas de reciclaxe de aceite de cociña que hai polas rúas da nosa vila”. As charlas celebraranse polas mañás nos colexios da Pobra e ao mediodía, ás 12.30 h, na praza de abastos. Polas tardes as sesións estenderanse ao auditorio do Museo Valle-Inclán (o día 11 ás 18 h coa Asociación das Amas de Casa) e ao Centro Sociocomunitario do Benestar (o mércores 12 ás 17.00 horas).
