O Concello de Boiro vén de realizar unha solicitude formal á Conselleira de Educación para iniciar os tramites para a apertura dunha Escola Oficial de Idiomas (EOI) no municipio, pois, segundo manifestan, trátase dunha proposta “moi demandada” dado que os boirenses se desprazan ata Ribeira ou Noia.
Previamente, a concellaría de Educación efectuou unha análise dos potenciais usuarios deste servizo coa finalidade de elaborar un dossier argumentado dos motivos polos que se quere implantar. Así mesmo, a Administración local barallou os centros nos que se podería instalar coma, por exemplo, o IES Espiñeira e A Cachada ao dispoñer de aulas libres.
O alcalde José Ramón Romero e a edil de Educación, María Outeiral, teñen xa solicitada unha cita coa conselleira de Educación, Carmen Pomar, co obxectivo de presentarlle esta proposta entre outras nas que se está a traballar para poder levar a cabo no municipio.
