O Concello de Ribeira recibiu esta fin de semana ao Club de Pádel local, e fíxoo no salón de plenos do Consistorio, onde os representantes do Executivo felicitaron aos integrantes da entidade deportiva pola súa relevante andaina e polos éxitos presentes e vindeiros das e dos seus integrantes. Tamén lle desexaron ao club o mellor dos futuros posíbeis, agora que vén de iniciar unha nova etapa con Andrés Santiago Hermo como presidente. Con sede no Centro de Raqueta de Coroso, o Club de Pádel Riveira conta con dous equipos masculinos e un feminino.
Os deportistas, que presentaron os equipos cos que disputarán os seus vindeiros desafíos, foron recibidos polo alcalde Manuel Ruiz, a tenente de alcalde María Sampedro e a concelleira de Deportes Juana Brión. No evento púxose de manifesto a popularidade que está adquirir o pádel a nivel galego e comarcal e como está a gañar cada vez máis seareiros e seareiras na nosa contorna. O evento pechouse cunha foto de familia.
