O BNG de Boiro celebrou hoxe unha rolda de prensa diante do Centro de Saúde do Saltiño para dar a coñecer as principais motivacións da agrupación, a nivel municipal pero tamén no eido comarcal e galego, para participar na manifestación que se celebra este domingo en Santiago, ás 12.00 horas, e defender un sistema de saúde de calidade e non privatizado. A mobilización vén da man da Plataforma en Defensa da Sanidade Pública de Galiza, plataforma na que tamén participa o BNG, entre outras organizacións de todo tipo.
A agrupación boirense aproveitou a rolda cos medios para facer un chamamento á cidadanía de Boiro para que se sume á manifestación e comparta o que cualifican de “xusta e necesaria reclamación”. Para este fin, o grupo nacionalista local vai achegar autobuses de balde que sairán ás 10.30 horas da marquesiña de diante da Casa do Concello e que regresarán unha vez rematada a concentración en Compostela.
Sobre as motivacións concretas que alentan a protesta, o BNG de Boiro fixo saber que “que fai falta un aumento de orzamento na sanidade máis tamén é preciso un modelo de xestión de xeito que remate coas listas de espera, que acabe coa precariedade laboral do persoal sanitario, que mellore os hospitais comarcais e os puntos de atención primaria, que reconverta servizos privatizados, que desenvolva plans de atención á saúde mental e á saúde da muller e que acabe co co-pago farmacéutico”.
