Este martes o Concello de Ribeira vai desenvolver unha actividade inserida nos actos conmemorativos do Día de Rosalía de Castro, que se celebra oficialmente este mesmo mes, o día 24 (data do seu nacemento en 1837). A cita deste martes, dirixida ao alumnado local de Primaria, é un espectáculo teatral para render tributo á célebre escritora galega e ás súas importantes contribucións en materia de literatura, feminismo, empoderamento e defensa da nosa identidade e da nosa lingua. Está previsto que participen medio milleiro de estudantes de Primaria.
Segundo informa o Concello, a celebración deste martes é unha celebración adiantada por un motivo concreto: a coincidencia, o 24 de febreiro, coa festividade do Entroido en período non lectivo. A homenaxe incluirá un espectáculo teatral de Xarope Tulú que levará por título Rilla Rilla. Haberá dous pases no Auditorio Municipal, un ás 10 e outro ás 12 horas. O Concello engade que asistirán en total máis de 500 nenos e nenas de todos os centros de Primaria do municipio. Ao rematar o espectáculo farase unha pequena reflexión sobre a figura de Rosalía e lerase colectivamente o seu poema Cantarte hei, Galicia de Cantares Gallegos, e rematarase co Parabéns para ti como celebración deste aniversario (183 anos).
Respecto do espectáculo teatral, a representación de Rilla Rilla, é unha peza que “fala da lingua viva, da realidade oral da que Rosalía bebeu na súa obra”. Segundo engade o Concello, “trátase dunha obra na o público participa en todo momento cos actores, para pór de manifesto a variedade dialectal do noso idioma, a riqueza da lingua e a través do relato vaise mergullando nun mundo de seseos, gheadas, rotacismos, un lugar con idiosincrasia propia que estivo aí sempre e ao que poucas veces lles poñemos atención”.
