O Entroido de Rianxo vai continuar esta fin de semana e, por mor das inclemencias climáticas previstas (entran novos temporais), tamén a seguinte. Así nolo vén de confirmar a veciñanza de Taragoña que, en colaboración co Concello de Rianxo, organizaba este sábado 29 de febreiro o seu tradicional desfile de carrozas (acompañado dun completo programa de música tradicional con Estroupele e Lusco e Fusco, de obradoiros e de inchables, no Campo de Pasos a partir das 17.00 horas), que tivo que ser adiado para o sábado 7 de marzo (se o tempo tamén o permite) polo aviso de mal tempo.
Pola contra, o que si que se mantén é a festa do Entroido en Araño (Rianxo), coa Festa do Cocido prevista para as 21.30 horas no Centro Cultural de A Capela, que inclúe cea e baile. Esta cita está organizada pola Asociación A Carballeira de Baia.
