Este luns 10 de febreiro celebrouse no Conservatorio de Música Profesional de Ribeira (o Conservatorio Enrique Paisal) un recital de guitarra clásica a cargo do músico Andrés Vázquez Romero. A cita musical, á que asistiron alumnos do conservatorio, profesores e público en xeral, formou parte da preparación do seu concerto de fin de estudos no Conservatorio Superior da Coruña. O concerto tamén contou coa presenza do concelleiro de Educación, Juan Brión, e a primeira tenente de Alcalde, María Sampredro. Quen queira descargar un fragmento da actuación con Andrés Vázquez Romero pode facelo a través desta ligazón específica de Dropbox.
Andrés Vázquez Romero (Noia, 1994) estudou interpretación de guitarra clásica no Conservatorio Profesional de Música Felipe Paz Carbajal da man de Serafín M. Fernández durante os graos elemental e profesional. En 2015 accedeu ao devandito Conservatorio Superior de Música da Coruña, onde se atopa rematando os estudos do itinerario de guitarra baixo a tutela de Eulogio Albalat. Ten asistido a clases maxistrais de Alex Garrobé (2016) e Michalis Kontaxakis (2018).
O programa da actuación en Ribeira incluíu interpretacións da Homenaxe a Toulouse-Lautrec de Eduardo Sainz de la Maza, a GrandOuverture de Mauro Giuliani, e máis a Sonata Op. 61 de Joaquín Turina.
