Comeza o miolo do Entroido galego e barbanzán e as nosas asociacións, colectivos e entidades diversas pechan fileiras arredor da festa por excelencia do mes de febreiro. Por exemplo a Asociación Amicos, que prepara unha gran celebración este venres no seu Centro de Atención Integral de Boiro, en Comoxo. A cita festiva, o Festival de Entroido de Amicos, será a partir das 11.00 horas e promete ser un evento de creatividade, participación, talento e, por suposto, inclusión.
Respecto do programa, está previsto que a partir das 11.00 comece o desfile de disfraces, no que participarán as usuarias e os usuarios dos centros da asociación, que ten sedes principais en Oleiros (Ribeira) e en Boiro. Nesta edición 2020 do festival, a entidade achegará dúas modalidades ao certame: a categoría individual e a categoría comparsa. Posteriormente, e até ben entrado o serán, sucederanse unha serie de actividades festeiras complementarias: entrega de premios do concurso de disfraces, xantar con receitas tradicionais, baile, karaoke, photocall, xogos populares, etc.
