O director xeral de Maiores e Persoas con Discapacidade, Ildefonso de la Campa, visitou esta mañá as instalacións de Amicos situadas no concello de Boiro. Alí destacou o labor que esta asociación realiza na comarca do Barbanza a través dos seus centros e programas en diferentes municipios da zona.
Carmen e Javier exerceron de guías durante a visita e estiveron acompañados da presidenta da Asociación Amicos, Esther Vidal; do director xeral da referida entidade, Xoán España; da concelleira de Servizos Sociais de Ribeira, Ana Ruiz; e de familias de usuarios.
En ExpresArte, o taller de expresión artística que se estaba levando a cabo no día de hoxe, obsequiaron a Ildefonso de la Campa cun retrato elaborado por eles mesmos a través do collage.
Na súa intervención, Esther Vidal deulle as grazas ao director xeral pola súa asistencia e aproveitou a ocasión para solicitar máis apoio no aumento de prazas.
Pola súa parte, Ildefonso de la Campa puxo en valor a importancia de que as administracións colaboren coas diferentes entidades sociais ao ser as que mellor coñecen as necesidades e propostas das persoas usuarias destes servizos. Neste senso, expresou o seu agradecemento a Amicos pola súa implicación e disposición a colaborar.
Así mesmo, familiares de usuarios expuxeron as súas inquedanzas sobre o futuro dos seus fillos e fillas, ademais de preguntar polas alternativas que ofrece a Xunta de Galicia.
