O Museo do Gravado de Artes, en colaboración coa A. C. Barbantia, organiza a sétima edición da exposición colectiva BarbantiaRte, a cal se celebrará nas instalacións da referida sala a partir do mes de marzo. O obxectivo desta mostra radica en que se represente a arte que se fai na comarca a día de hoxe, contribuíndo á difusión dos creadores.
Desde a organización manifestan que contemplan amosar todo tipo de disciplina artística: pintura, escultura, fotografía, gravado, banda deseñada, performance ou videocreación, entre outros. Tamén sinalan que resulta importante que estea enmarcada para facilitar a súa colocación coma, por exemplo, no caso de lenzos anchos.
Aínda que non hai medida nin temática establecida, solicitan que só sexa unha creación por cada artista e que non sexa anterior ao 2017.
Os interesados dispoñen ata o 10 de marzo para levar a súa obra física ao Museo. Así mesmo, coa finalidade de elaborar o catálogo da exposición, resulta preciso achegar unha fotografía da peza -concretamente, en formato .jpg e con boa calidade, mínimo 300 pp-, acompañada dunha ficha técnica onde figure o nome do autor ou autora, a técnica, as medias, o prezo -en caso de que se desexe poñer á venda- e unha pequena recensión ou texto do artista cunha extensión de 10-15 liñas. Isto último pódese ir adiantando vía enderezo electrónico, establecendo como data límite o 5 de marzo.
