Este venres 7 de febreiro temos unha cita en Boiro coa música galega e coas raizames, ben fondas, desta parte tan importante da nosa identidade. A novena edición do Encontro de Música Tradicional celébrase a partir das 20.00 horas no Centro Social, e forma parte da programación local de actividades para celebrar outra vertente galega que vén de antigo: o Entroido.
Contará coa presenza de Queicoa (banda de Noia creada en 2016 da man do profesor Fernando Docampo) e de Abeloura (agrupación boirense con sede en Cespón, abeirada á asociación do mesmo nome), ás que cómpre engadir, no cartel, as seguintes bandas de música tradicional galega: Xoaniñas, Os da Boina, Chorima, O Son das Ferreñas e máis os Combos da Escola de Música de Boiro (EMB). A romaría musical vén da man, precisamente, da EMB, xunto co Concello de Boiro e Sonaxe.
