Representantes da FIFA veñen de anunciar a súa vindeira estadía en Ribeira para facer as probas de homologación do novo céspede artificial do Campo de Fúbol da Fieiteira, amais da expedición do certificado pertinente. Así o confirmou este martes 11 o Concello, quen engadiu que o complexo deportivo xa está a pleno rendemento (unha vez rematado o fornecemento da nova superficie de xogo), cos primeiros encontros celebrados esta pasada fin de semana. A visita dos membros da FIFA está fixada para este martes 18 de febreiro.
O Concello recorda que a dotación foi levada a cabo pola empresa Banco Bilbao Vizcaya Argentaria (comportando un investimento superior aos 222.000 euros) e que en virtude do proxecto técnico executado estendeuse un novo céspede de última xeración con homologación FIFA Quality Pro, que, en palabras do Executivo ribeirense, “permitiría mesmo a disputa de partidos de categoría nacional”.
Ademais, equipouse o estadio cunha nova rede de rego automático, con canóns emerxentes de gran alcance situados fóra do rectángulo de xogo, así como porterías regulamentarias de fútbol 11 e fútbol 7 e bandeiriñas nas catro esquinas do terreo.
O Concello sinalou que proxecto técnico prevé un plan de mantemento por cinco anos que inclúe tanto á formación do persoal municipal para obter os coñecementos necesarios para a conservación do céspede como a realización dous veces ao ano de tarefas de mantemento por parte da empresa adxudicataria.
Alén dos traballos na Fieiteira, o Executivo ribeirense emprendeu outras actuacións encamiñadas a instalar céspede artificial en campos do termo municipal que carecían del, como os da Guía en Carreira e A Trinidade en Oleiros.
