Logo da xornada de calma deste mércores, amencemos este xoves 16 con mal tempo na comarca, protagonizado por un novo novo temporal con ventos do sur e do suroeste que poden ter picos de forza 8 e con aviso de precipitacións que poden chegar aos 90 mm recollidos nun período de 12 horas. Por estes motivos, a Xunta decretou a alerta laranxa costeira nas provincias da Coruña, Lugo e Pontevedra.
Novamente, suspéndense as actividades no exterior nos centros educativos da totalidade das ditas provincias e tamén as actividades deportivas ao aire libre nestas zonas, onde se esperan refachos de máis de 100 quilómetros por hora, que afectarán a partir de mañá á totalidade da provincia da Coruña e tamén a Pontevedra e á Mariña de Lugo. No resto da comunidade o nivel de alerta será amarelo con refachos de ata 95 quilómetros por hora.
Como vén sendo costume nestes casos e co fin de “garantir a seguridade dos bens e as persoas”, a Xunta lembra que, co vento, o mobiliario urbano pode desprazarse e os restos de árbores e pólas que puideron caer á vía poden condicionar a circulación. Tamén se lle recorda á poboación a importancia de seguir as medidas de protección como retirar os obxectos que poidan caer á rúa dende os tellados, balcóns e fiestras e evitar pasar preto de edificios en ruínas, en construción, árbores, paneis publicitarios e obxectos susceptíbeis de desprazarse co vento.
Ante as fortes chuvias, aconséllase “circular con precaución e informarse antes do estado das estradas, non atravesar zonas inundadas ou que poidan chegar a asolagarse (pontes, torrentes, etc.), non aparcar nas ribeiras dos ríos e non utilizar vehículos lixeiros nin de pouca estabilidade (bicicletas ou ciclomotores)”.
Debido ao temporal costeiro, lémbrase a importancia de ficar “lonxe da liña de costa e das praias e paseos marítimos co fin de previr un eventual golpe de mar que poida arrastrar persoas ou obxectos”.
Por mor da alerta laranxa no litoral, tamén se aconsella a suspensión das actividades pesqueiras e marisqueiras.
