A plataforma medioambiental Verdegaia comezou o ano poñendo o foco na comarca do Barbanza: lanzando un comunicado no que se denuncian “graves irregularidades na Estación Depuradora de Augas Residuais de Ribeira”, entre as que se atopan, segundo fai saber a organización ecoloxista, a “existencia de vertidos sistemáticos de augas industriais no Polígono de Xarás á rede urbana de saneamento da EDAR do concello”.
Verdegaia explica que os devanditos datos figuran na auditoría feita por Adantia1 en relación ao funcionamento da dita instalación, aos que a plataforma tivo acceso e entre os que figuran, engade, “numerosas eivas que non parecen razoábeis nunha infraestrutura que leva tan pouco tempo en funcionamento”. Entre estas eivas atópase tamén o devandito problema do aliviadoiro de augas de orixe industrial. Ao fío disto, Verdegaia lembra que en “todos os documentos oficiais relacionados coa EDAR insístese en que esta está proxectada para auga urbana, e non para augas industriais”.
