Unha intensa axenda está marcando a presenza dos alcaldes da Mancomunidade de Municipios Arousa Norte durante a súa estadía en FITUR, a feira internacional de turismo de referencia que se celebra estes días no recinto IFEMA de Madrid.
Despois de que na tarde de onte tivese lugar a estrea oficial do vídeo divulgativo do Camiño de Santiago do Barbanza, A Orixe, que une Corrubedo con Compostela; agora os rexedores atópanse mantendo diversos encontros enfocados en promocionar, de maneira conxunta, os atractivos turísticos que atesouran Ribeira, A Pobra do Caramiñal, Boiro e Rianxo. Neste senso, entrevistáronse coa directora de Turismo de Galicia, Nava Castro, e conversaron co presidente da Xunta, Alberto Núñez Feijóo; ademais de concertarse reunións de traballo con varios touroperadores interesados en coñecer os recursos náuticos de Arousa Norte.
Así mesmo, programouse outro encontro de traballo coa Mancomunidade do Salnés co obxectivo de afondar nos lazos de cooperación entre as dúas bandas da ría arousá, acadando sinerxías sobre a base dun patrimonio hídrico único na xeografía galega e estatal.
