A xerente de Suelo Empresarial del Atlántico (SEA), Beatriz Sestayo, reuniuse onte co rexedor de Rianxo, Adolfo Muíños; a tenente de alcalde, María del Carmen Figueira; o presidente da Asociación Rianxeira de Empresarios, Luis Duro; o secretario da entidade, Diego Rodríguez; e a técnica Ana Vicente. Na xuntanza analizáronse novas fórmulas de comercialización para o parque empresarial rianxeiro. A este respecto, Beatriz Sestayo manifestou que “quedamos á espera das demandas dos empresarios para tentar adaptar os plan de comercialización da SEA no polígono.”
Pola súa parte, o mandatario local, Adolfo Muíños, amosou a súa satisfacción polo encontro no que os empresarios deron traslado das “demandas concretas do que se pode facer dentro do marco legal e ordenanzas do propio parque”. Tamén agradeceu “a presenza e a predisposición da SEA para que a esas posicións que os empresarios demandan se lle poida dar viabilidade.”
Así mesmo, a tenente de alcalde, María del Carmen Figueira, transmitiu a súa confianza en que “por unha vez por todas a teoría se converta en realidade”; mentres que Luis Duro destacou que “as condicións para adquirir terreo son inmellorables e as relacións con SEA e o Concello son inmellorables. SEA está aberto a negociacións.”
O polígono de Rianxo conta cunha superficie bruta de 317.728 metros cadrados e netos 200.156, estando dispoñibles 127.470. En total, están vendidas 24 parcelas.
No 2018 avanzouse neste eido comercializándose dúas parcelas, as cales sumaban 4.141 metros cadrados; e en 2019 outras dúas -de 1.125 e 3.466 metros cadrados- a Proameixa e Transportes Potel.
