Con motivo do centenario do afundimento do vapor-correo Santa Isabel que tivo lugar o 2 de xaneiro de 2021, o Concello de Ribeira organiza a Primeira Milla Solidaria ‘Heroínas de Sálvora’. Trátase dun certame deportivo que, ademais de posuír unha vocación benéfica, busca lembrar este acontecemento histórico ao tempo que se exalta o papel daquelas mulleres que se botaron ao mar para rescatar aos náufragos, evitando engrosar as listas de falecidos e que a traxedia fose maior. Os encargados de detallar as características da referida proba foron a concelleira de Deportes, Juana Brión; Abraham Benítez, principal impulsor da iniciativa; e Noelia Riaño no nome da Asociación AGADEA.
A cita desenvolvese o 5 de xaneiro na parroquia de Aguiño, coa intención de que se consolide no tempo como unha das primeiras competicións atléticas no calendario anual a desfrutar por parte dos afeccionados. Así, esta carreira consta de 1.609 metros de percorrido na modalidade Master, a cal arrancará ás 12.45 horas. Antes, a partir das 11.00 horas, sucederanse outras categorías con distancias menores: Biberón (200 metros), Prebenxamín (400 metros) e Sub 10-Sub 12 (1.000 metros). A partir das 11.45 horas terán lugar outras catro carreiras máis, todas de 1.609 metros e separadas por intervalos dun cuarto de hora: Sub 14-Sub 16, Sub 18-Sub 20, Sub 23-Senior Mixta e Zapatilla Inclusiva.
