O mecenado coa innovación e a investigación médica do presidente de FRINSA, Ramiro Carregal, escribiu onte un novo capítulo. Foi en Compostela, e tivo como protagonista ao empresario afincando en Ribeira e máis á FIDIS (Fundación Instituto de Investigación Sanitaria de Santiago), que presentaron a segunda edición do Premio de Investigación en Cardioloxía. No acto, formalizando o acordo que fai posíbel o galardón, participaron Ramiro Carregal, a xerente da Área Sanitaria de Santiago e Barbanza e presidenta da FIDIS, Eloína Núñez, o doutor José Ramón González-Juanatey e máis Isabel Lista García, directora da dita fundación.
Segundo fixeron saber, a nova convocatoria vén cunha contía de 20.000 euros, sendo o seu obxectivo, novamente, facer avanzar a investigación en doenzas valvulares cardíacas, que é unha das enfermidades máis estendidas entre a poboación.
Como lembraremos, a primeira edición do recoñecemento médico impulsado por Ramiro Carregal foi dar na recta final de 2019 a mans do proxecto do equipo liderado por Diego López Otero. A distinción supuxo 20.000 euros que irán destinados ao proxecto que desenvolve este grupo de médicos do Complexo Hospitalario Universitario de Santiago (CHUS). O traballo do doutor Diego López e o seu grupo de investigación céntrase en afondar na pegada da amiloidose cardíaca en doentes con estenose aórtica severa.
