A banda ribeirense Heredeiros da Crus vai estar os días vindeiros en Boiro para presentar o seu novo disco, Derretidos. Farano na Pousada da Galiza Imaxinaria que rexenta Suso Santamaría, o día 14 de marzo, logo dunha xira galega, estatal e internacional que foi bautizada polos seus integrantes como “Xira Europrea”.
Os seareiros privilexiados que conseguiran entrada (o concerto xa ten o cartaz de sold-out) van ter unha boa historia musical que contar ás xeracións vindeiras, que, de seguro, seguirán escoitando aos Heredeiros e eses temas que, como Esquimales, poñen de volta e media as redes sociais (Esquimales xa obxecto de case 31.000 visualizacións, e segue adiante, contra vento e marea, coa súa etiqueta de linguaxe incorrecta potencialmente ofensiva).
Se ben o fío temático do concerto será a presentación de Derretidos, que chega media ducia de anos despois do seu anterior LP (Jard Rock con Fe) e tres logo do seu último single (Buscando a Superfama), de seguro que haberá marxe para os temas históricos que lle deron ao grupo iso que veñen chamando, con moita rexouba, “a superfama”. Derretidos está composto por doce contundentes cancións con todos os trazos orixinais de Heredeiros presentes (o humor, o galego, a retranca, a contundencia rockeira) e algún que outro máis de agasallo.
