O PSdG de Ribeira pide o arranxo dunha beirarrúa afectada por un derrube na costa da Mámoa

Os socialistas de Ribeira veñen de mostrar a súa preocupación polo estado dun treito da costa da Mámoa na que, segundo advirten, diversas causas provocaron un derrube de terras e vexetación que complica o libre paso de peóns pola beirarrúa. Segundo engade o grupo local do PSdG que coordina José Vilas, este treito crítico atópase na rúa Alcalde Fernández Bermúdez, xusto na marxe esquerda onde se estreita o paso dos viandantes.

O derrube de terras rexistrouse o pasado 30 de decembro, derivando na imposibilidade de seguir usando as beirarrúas (os peóns están obrigados a cruzar a calzada para transitar, o que implica, engaden os socialistas, problemas serios de seguridade, ao tratarse dunha estrada con curvas moi pechadas). O grupo lembra que “a día de hoxe os escombros seguen sen ser retirados”. Por esta razón, piden que o Concello habilite de inmediato a beirarrúa afectada, co fin de garantir a seguridade dos residentes e, tamén, dos usuarios das infraestruturas deportivas da Fieiteira.