O PSdeG-PSOE de Ribeira propón dotar á entrada do hospital comarcal dunha viseira de protección

15 Xaneiro 2020
Cedida por PSdeG-PSOE de Ribeira

O grupo municipal do PSdeG-PSOE ribeirense levará a pleno a posibilidade de dotar a zona da entrada principal do Hospital da Barbanza dunha viseira de protección co obxectivo de, segundo manifestan, “mellorar as condicións de accesibilidade ao centro sanitario dos pacientes e usuarios do centro asistencial.”

A formación expón que, en días de chuvia intensa, resulta complexo o acceso pola entrada principal do hospital comarcal para persoas con mobilidade reducida, diversidade funcional ou maiores en cadeira de rodas que teñen que ir a unha consulta ou revisión. Os socialistas argumentan que, con condicións meteorolóxicas adversas, estes usuarios acábanse mollando a pesar dos intentos por evitar esa situación, podendo recorrer, en caso de temporal, ao permiso da supervisora ou coordinadora de Urxencias para entrar por esa área determinada, a cal dispón dun cuberto, pero “sempre que sexa unha persoa con mobilidade reducida, ou pacientes críticos, e de tódolos xeitos é unha merma de tempo moi notable, para uns e para os outros.”

Neste senso, consideran que a instalación dunha viseira pouco máis ancha que a beirarrúa fronte á entrada principal, “facilitaría solventar o inconveniente que sofre este colectivo, e calquera outro usuario que teña que acceder ao recinto sanitario, e que os protexa das inclemencias do tempo hostil.” Deixan o aspecto do deseño a criterio dos técnicos do organismo competente, poñendo como exemplo unha peza tipo ménsula en aluminio, resistente á corrosión, con fragmentos en aceiro inoxidable e cubrición en prancha de policarbonato, metacrilato ou vidro laminado.

Conclúen expresando que “esta obra beneficiaría a unha importante poboación, e redundaría nun aumento da seguridade na accesibilidade ao Hospital da Barbanza. En definitiva, nunha mellora de vida das persoas, que é, o fin e o cabo, o que perseguimos.”

Outros artigos

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...