O programa Castelao 2020 achega dúas xornadas de presentacións literarias, homenaxes e roteiros

29 Xaneiro 2020

O 2020 comezou cun forte compoñente literario: co amplo programa de actividades conmemorativas do 70 cabodano do falecemento de Alfonso Daniel Rodríguez Castelao, o célebre escritor, debuxante, intelectual e político rianxeiro. O programa vén da man do Concello e todas as accións que o integran teñen un cometido común, que é seguir lembrándolle ao mundo a vixencia do seu discurso e do seu legado. Esta fin de semana o programa Castelao 2020 chega ao seu punto culminante estes días cunha cita con Barbantia, un acto floral, un paseo literario por Rianxo e unha homenaxe póstuma ao político, docente e escritor palmeirán Plácido Betanzos.

As propostas comezaron o 20 de decembro coa apertura da exposición Sempre en Galiza: homenaxe de artistas galegos, habilitada no Auditorio até o 1 de febreiro, e proseguiron cunha performance poética de Ricardo de Barreiro (o 24 de xaneiro na Biblioteca Municipal) e máis coa proxección, o día 25, da curtametraxe O Castelo da Lúa, de Vou Films, dirixida e escrita por Lois Basallo e protagonizada por Sergio Pazos, Miguel Pernas e, tamén, o castelo medieval rianxeiro que lle dá título e serve de pano de fondo.

Polo que se refire á axenda desta finde, este venres 31 de xaneiro celébrase na Sala Arcos Moldes do Auditorio unha dupla estrea literaria: a presentación do número 151 de A Voz de Barbantia e (tamén) a recalada en Rianxo da novela Escribirme, de Héctor Pose Porto (Malpica, 1964) e publicada por Edicións do Peirao.

O sábado 1 de febreiro ás 12.00 horas o busto de Castelao no paseo da Ribeira será o escenario dunha ofrenda floral ao autor de Sempre en Galiza, ao que seguirá un roteiro histórico-literario polas rúas de Rianxo.

Amais, faráselle unha homenaxe póstuma a Plácido Betanzos, autor do libro Relatos e lembranzas,recentemente publicado co apoio directo da Deputación da Coruña. Participarán José Muñiz Santalla (comisión de homenaxe a Plácido Betanzos), Manuel Cartea Gómez (Barbantia) e Adolfo Muíños Sánchez (alcalde de Rianxo). Presentará o acto Xosé Deira Triñanes. Será ás 20.00 horas no salón de actos do Auditorio.

Por certo que a presentación de Desvelando a Ademar Escambia, de José Carou Rey, prevista inicialmente para este sábado, organizarase os días vindeiros nunha data que será dada a coñecer polo Concello.

Outros artigos

Publicidade

Revista en papel

Opinión

“Oporto”. Alberto Barciela

“Oporto”. Alberto Barciela

Oporto puede seguirse en el sentido serpenteante de un río, o en la vertical de un océano, ascenderse o descenderse por meandros encajados en calles que a veces semejan acantilados, que siempre se precipitan hacia agua, una urbe universal cerca del tiempo que le tocó...