Malia que a sona (as reportaxes, os documentais, os ensaios, as entradas da Galipedia) vaia para os concellos da provincia de Ourense, o Entroido vívese na costa galega, para entendernos, coma se cada festividade anual fose a derradeira. Ou case. Un exemplo disto é o Entroido de Boiro, que é unha festa gastronómico-musical-creativa (e moitas cousas máis) e que adoita ver cargada de actividades para para veciñas, veciños e visitantes de todas as idades. Para que o listón de xolda e participación siga ben alto, o Concello elaborou este ano unha completa axenda cultural e festeira que abranguerá practicamente todo o mes de febreiro (e parte do marzo) e que terá varios centros neurálxicos de actividade, comezando polo Centro Social de Boiro e rematando, por suposto, a pé de rúa. O programa Febreiro Choqueiro que propón o Concello dará comezo o venres 7 ás 20.00 horas, no Centro Social de Boiro co espectáculo Combo Tradicional.
Unha semana máis tarde, no mesmo emprazamento, desenvolverase a presentación A xestión cultural en Galicia, unha publicación-investigación que bota luz sobre o sector cultural da nosa terra, na nosa lingua, e as súas perspectivas profesionais (as perspectivas dos eidos da edición, o audiovisual, as artes plásticas ou a música, entre outros). Será o venres 14, tamén ás 20.00 horas, no Centro Social de Boiro.
Un día máis tarde, o sábado 15, celebrarase no Centro Social a Batalla de Galos Barras Bravas, prevista para sa 17.00 horas.
A festa urbana será a protagonista da seguinte cita do Entroido boirense: o Venres de Abadesas (21 de febreiro), que será unha xornada de lecer, encontros e actividades culturais a pé de rúa en pleno Boiro, sempre e cando as condicións climáticas o permitan.
Un día máis tarde, o sábado 22, celebrarase o tradicional Entroido na Boliña, a partir das 19.00, no núcleo boirense do mesmo nome, un clásico nas celebracións comarcais e galegas deste mes de febreiro, cos seus habituais concursos, sorteos, xogos, concertos e degustacións de produtos típicos destas datas. A festa proseguirá en Boiro ao día seguinte, a partir das 17.00, co programa de actividades do Domingo de Entroido. E para que ninguén bote de menos a festa durante moito tempo, o martes 25, Martes de Entroido, o Concello converterá o centro da cidade nunha gran celebración, con desfiles, concursos de disfraces e animación na rúa, a partir das 18.00 horas.
O programa rematará o primeiro de marzo, co Domingo de Enterros e o Enterro da Cunca, do Oso e da Sardiña.
