O Concello de Boiro abre este xoves 16 o prazo de presentación de solicitudes para a convocatoria dun proceso selectivo dunha praza de docente, quen se encargaría de impartir a acción formativa Cociña, correspondente ao plan de Acción Formativa para Desempregados (AFD) 2019 que se desenvolverá no centro de formación e viveiro de empresas situado no polígono industrial de Espiñeira. Os interesados poderán formular as súas solicitudes nun período de dez días hábiles a través do Rexistro Xeral. As bases e a instancia desta convocatoria poden descargarse da páxina web www.boiro.org ou conseguirse na portaría da Casa Consistorial.
Os cursos AFD están indicados para mozos e mozas desempregados menores de 30 anos. Para participar nesta acción formativa é preciso ter a ESO ou Competencias Clave de nivel 2, inscribíndose a través da Oficina de Emprego.
O de Cociña iniciarase en febreiro e constará dunhas 830 horas, en horario de luns a venres, de 16.00 a 21.00 horas. No mes de marzo comezará o de Servizos de Bar e Cafetería, dunhas 650 horas e que tamén se impartirá polas tardes, no mesmo horario. Ademais da formación específica de cada especialidade, o alumnado disporá duns módulos de formación transversal sobre inserción laboral e sensibilización medioambiental, así como formación para a igualdade.
