O Club Remo Puebla celebrou a súa asemblea anual de socios abordando diversos asuntos

Imaxe de arquivo da asemblea celebrada en marzo de 2019. Cedida por Club Remo Puebla

O Edificio de Deportes Náuticos de O Castelo foi escenario no día de hoxe, venres 10, dunha asemblea xeral de socios e socias do Club Remo Puebla. Entre as cuestións a tratar, a directiva expuxo o balance económico das contas do 2019 e anunciou os futuros gastos da actual tempada coma, por exemplo, a inversión en material de ximnasio e novas embarcacións tras o recente crecemento en número de deportistas que fan uso das instalacións diariamente. Así mesmo, o club pretende dar un paso adiante na modalidade de banco móbil invertendo en material para a mesma.

No encontro tamén se informou sobre o estado actual do club, cualificándoo como unha época dourada en canto a número de deportistas e socios, pero lamentan que o espazo do edificio non estea preparado para dar cabida a tal cifra, razón pola cal se segue loitando por unha obra de ampliación, afirmando que agora mesmo está en mans do Concello da Pobra do Caramiñal e doutras entidades coma Portos de Galicia.

Esta asemblea coincidiu coa fin de semana na que arrancan as competicións, pois mañá, sábado 11, as categorías base, mais concretamente dez equipos, participan na IV Contrarreloxo de Bateis C. R. Rianxo, a cal se desenvolverá no peirao a partir das 16.00 horas. Ademais, o domingo 12 o equipo de traiñeiras de veteranas participará na súa primeira regata: V Memorial Pepe O Ruso, en Bueu.