A Coordinadora para Estudo dos Mamíferos Mariños (CEMMA) achegou onte pola noite novidades importantes sobre os rescates realizados aos golfiños comúns encallados na festividade de Reis en diferentes puntos da ría de Arousa: no porto de Vilagarcía (dous golfiños), outros dous en Neixón, en Boiro (onde se puido pór en liberdade o exemplar máis novo pero non se logrou facer nada polo adulto), un quinto nas canles fluviais de Catoira (ao que se tentou rescatar, non sen certa dificultade) e un sexto na dársena de Pontecesures, río Ulla arriba (que ao longo do día de Reis tentaba ser devolto ao mar sen que se tiveran noticias sobre o éxito das tarefas). Segundo informou esta noite o CEMMA, actualizando o parte de novas, tres dos golfiños encallados non puideron finalmente sobrevivir. Trátase do exemplar adulto de Neixón e dos dous que deron remontado o Ulla.
Os que si que puideron facelo foron os cetáceos de Vilagarcía e o pequeno golfiño de Neixón, que foron devoltos ao mar o día de Reis e que na xornada do 7 xa non foron albiscados na ría, polo que se deduce que poden estar tentando volver a mar aberto na procura da manda da que forman parte (aínda que existen moitas probabilidades de que volvan varar, xa que esta é unha dramática pauta que se repite case sempre).
O CEMMA engadiu que neste intre “estanse a analizar os datos e recollendo mostras biolóxicas para estudos posteriores e tratar de esclarecer así cal foi o inicio do proceso que levou a estes individuos a protagonizar esta situación”. A coordinadora agradeceu novamente os importantes traballos de rescate levados a cabo polos membros locais de Protección Civil, bombeiros e autoridades que “prestaron apoio”, e máis ao voluntariado de CEMMA.
Respecto das causas que motivaron o falecemento, non hai nada concluínte. Por unha banda, sábese que padecían doenzas crónicas e máis un proceso prolongado de desnutrición, pero as doenzas, que non eran graves, non deberan impedirlles alimentarse. De feito, estaban en bo estado de saúde. No que atinxe aos porqués de que dous deles foran dar ao río Ulla e o resto conseguise chegar ao fondo da ría, ten relación directa co feito que a auga doce (e a salobre tamén) logra revitalizalos e rehidratalos.
