A Coordinadora para o Estudo dos Mamíferos Mariños vén de recalcar dende o seu Facebook a necesidade de estarmos preparadas/os para saber como actuar en caso de ser testemuñas dun encallamento de cetáceos ou outros mamíferos, por exemplo lobos mariños cincentos, que son habituais nestas datas na nosa costa. O CEMMA tamén lembra que se está a rexistrar en xeral un elevado número de varamentos no litoral galego, incluída a ría de Arousa e os seus concellos, por mor do tren de temporais e, tamén, por causas directamente relacionadas coa actividade humana, por exemplo o dano provocado polas capturas accidentais.
A respecto de todo isto, a coordinadora fai fincapé na necesidade de actuar seguindo unhas pautas definidas: se albiscamos un golfiño ou unha balea ou un lobo mariño á deriva e en risco de varar, o primeiro que debemos facer é comunicalo ao 112 e ao teléfono de coordinación da Rede de Varamentos de Galicia (686 989 008). En calquera destes casos, recordan, “non é de abondo con subir a foto dos exemplares albiscados nas redes sociais”. De feito, contactar a través das ditas canles segue a ser o mellor xeito de axudalos.
O CEMMA tamén recalca a importancia de seguir un estrito protocolo de actuación no caso de atoparmos en praias ou cons algún exemplar de lobo mariño. “Cómpre non molestalos, alertar da súa presenza e ter moito coidado cos cans que levemos ao noso carón”. A coordinadora recoñece que está a detectar acoso de cans a exemplares que queren descansar nas praias coa caída da tarde.
