O Centro Cultural Lustres Rivas dará cabida do 10 de xaneiro ao 29 de febreiro a unha nova exposición titulada Mis etapas. Esta mostra retrospectiva do artista noiés Manuel Romero atópase formada por 23 óleos e 3 esculturas envellecidas mergullándose no mar durante un ano. Ademais, o cadro Puerto de Riveira y Club Náutico será doado polo artista ao Concello ribeirense.
A inauguración de Mis etapas terá lugar o venres 10, ás 21.00 horas. As visitas poden realizarse de luns a venres, en horario de 10.00 a 14.00 e de 19.00 a 21.00 horas, así como os sábados, de 11.00 a 14.00 e de 19.00 a 21.00 horas.
Residente en Londres, onde se licenciou en Belas Artes pola Universidade de Kingston, Manuel Romero é internacionalmente recoñecido como un dos expoñentes da arte española. Entre os lugares nos que ten exposto figuran o Museo Adzak de París, o Instituto de España en París, Oslo e Chicago, conseguindo a loanza do público. A súa obra tamén chegou a Xapón e Nova York, e mesmo creou e dirixiu unha galería de arte na capital británica, denominada The Blason Gallery.
Así mesmo, foi galardoado co Premio Barbantia da Cultura Galega 2017, ademais de recibir outros premios e recoñecementos.
