Baixo o título Un café co alcalde, o Concello de Boiro manifesta que se atopa traballando nun programa de participación cidadá co que se pretende chegar á veciñanza de todo o municipio, mediante o cal disporían dunha alternativa diferente para trasladar as súas demandas. A iniciativa arrancará en febreiro e terá lugar a terceira semana de cada mes nunha parroquia distinta, sendo a intención ir alternando as de costa coas de interior. Estes encontros periódicos realizaranse nos centros sociais e culturais, antigas unitarias ou bares, co obxectivo de que sexan lugares “cómodos e accesibles para manter este tipo de xuntanzas distendidas.”
Tamén apuntan que así aspiran a ter un contacto máis directo coa cidadanía, dispoñendo dunha maneira diferente para trasladar as súas peticións e demandas, ao tempo que se activa “un tipo de participación cidadá directa e útil.” Independentemente das reunións que se poidan ter a título individual co rexedor no Consistorio, a finalidade desta medida radica en coñecer as preocupacións ou necesidades comúns dos residentes dun mesmo lugar.
Así mesmo, desde o Concello sosteñen que este formato de contacto entre o alcalde e a veciñanza “estase levando a cabo xa noutros municipios e funciona moi ben.”
