A Pobra vibrará esta fin de semana ao son de Vive, aprende e goza do noso, impulsada por Eiradela Asociación Cultural en colaboración co Concello. O programa de actividades arrancará o sábado 11 baixo o título A tradición en clave de xénero. Así, a ruada e apertura das xornadas correrá a cargo de Os Liantes, ás 19.00 horas, para posteriormente dar paso a dous obradoiros: o primeiro, ás 20.30 horas, será Bailar a canda os tempos, da man de Carme Campo e Chus Caramés; mentres que o segundo, Regueifa 2.0, está previsto para as 22.00 horas e será impartido por Lupe Blanco e Kike Estévez. O día rematará co concerto de Os da porfía, ás 23.30 horas, seguido dunha foliada libre.
A xornada do domingo 12 levará por título O tradi é moda, tendo lugar a apertura de portas dunha mostra de artesanía, ás 12.00 horas. A continuación, comezará o Vermú Ghaiteiro, prolongándose desde as 12.15 ata as 17.00 horas, amenizado por A Dorniña de Abanqueiro, AGPT da AMPA de Escarabote, Aínda é sedo, As da canteira, Arrancadeira, Bailadela, Caramiñas, Lumieira, Nunca é tarde, O son das ferreñas, Os sentenarios, Pedra de Aroña, Tahumiños, Tanxedoira, Xiada e Xilbarbeira. Ás 17.00 horas será a quenda do obradoiro Iniciación ó baile solto, con Luís Prego; mentres que ás 19.30 horas impartirase O Maneo. Ademais, en horario de 12.00 a 20.00 horas, Alén das Olas ofrecerá un taller participativo de olaría e cerámica, o cal será de balde e para tódolos públicos. A programación tamén inclúe o faladoiro A Galicia dos mil panos, por Sete Espadelas e previsto para as 18.30 horas. A festa chegará ao seu fin ás 21.00 horas, amenizada por Joel Padín, Caraveiros, Trécola e Xesteiras.
Os actos concentraranse no posto situado na praza Maior.
